Íris Björk er lýrískur sópran sem hefur vakið athygli bæði á Íslandi og í Noregi. Hún nam við Listaháskóla Íslands, Óperuháskólann í Stokkhólmi og lauk mastersnámi frá Listaháskólanum í Osló árið 2023. Í kjölfarið var hún ráðin við óperustúdíó Norsku Þjóðaróperunnar, þar sem hún hefur síðan komið fram í fjölmörgum uppfærslum, meðal annars í nýju óperunni Fønix, Töfraflautunni og Elektru.

Íris Björk hefur sérstakan áhuga á nútímaóperum og frásögnum sem hafa djúpstæð áhrif á áhorfendur. Hún er stofnandi óperukompanísins hinÓperunnar, sem vinnur að auknum sýnileika hinsegin sögupersóna og fjölbreytileika í óperulistinni. Markmið hennar er að skapa óperulist sem endurspeglar samfélagið okkar eins og það er.