Að loknu námi í Bandaríkjunum og Svíþjóð starfaði Jóhann G. Jóhannsson sem tónlistarstjóri Leikfélags Reykjavíkur (1981-’91) og Þjóðleikhússins (1991-2010) og samdi þá einnig leikhústónlist af ýmsu tagi. Í seinni tíð hefur Jóhann helgað sig tónsmíðum og textagerð auk þess að útsetja fyrir Sinfóníuhljómsveit Íslands, m.a. tónlist sína við „Skilaboðaskjóðuna" og tónlistarævintýri sitt um „Strákinn og slikkeríið". Lag og ljóð Jóhanns „Landið mitt“ var valið vinningslag og ljóð í samkeppni um nýtt kórverk í tilefni hundrað ára fullveldis Íslands 2018. Sönglög Jóhanns við ljóð Laxness hafa verið gefin út á geisladisk og nótnabók, og verk hans „Be not afeard – konsert fyrir sópran og kammersveit" var frumflutt af syngjandi stjórnandanum Ragnheiði Ingunni á Óperudögum í nóv. 2022 og hljóðritað með Sinfóníuhljómsveit Íslands 2024.