Patrick Egersborg er norskur óperusöngvari og framleiðandi frá Þrándheimi. Hann stundaði nám við HfM „Hanns Eisler“ í Berlín og lauk meistaragráðu í óperusöng frá Listaháskólanum í Osló (KhiO). Patrick hefur komið fram sem einsöngvari á fjölmörgum óperuhátíðum og tónleikastöðum, meðal annars á Oslo Opera Festival, Opera Søholm, í Hörpu, Norsku þjóðaróperunni og ballettinum, Copenhagen Opera Festival, Kristiansund Opera, Grimeborn Festival og Grange Park Opera í Bretlandi.

Patrick hefur mikinn áhuga á að kanna hvernig óperuformið getur þróast og höfðað til nýrra kynslóða áhorfenda og hefur skapað vettvang fyrir þróun nýrra leiða í óperulistinni. Auk þess að stofna hið vinsæla Opera Salon í Kaupmannahöfn átti hann stóran þátt í stofnun Operakollektivet, eins fyrsta sjálfstæða óperuhóps Noregs. Hópurinn frumsýndi óperurnar Team Player árið 2016 og Systemet árið 2023.

Systemet, eftir Gísla Grétarsson og Oda Fiskum, var flutt í samstarfi við Opera Trøndelag og á Óperudögum í Reykjavík. Patrick framleiddi sýninguna og söng jafnframt aðalhlutverk málafulltrúans (The Caseworker). Árið 2023 þreytti hann frumraun sína sem Conte di Luna í Il trovatore hjá Kristiansund Opera.